WILLEMSTAD- 8 di novèmber 2024 – Dilanti invitadonan lokal i internashonal i tambe prensa a estrená e pelíkula nobo internashonal ‘Dating My Past’ ku aktuashon prinsipal di nos Chanelle de Lau ku ademas di ta aktris ta karga diferente título di beyesa. Den e pelíkula ‘Dating My Past’, Chanelle ta hunga e papel di Lexie, un terapista relashonal ku ta reflekshoná riba su propio relashonnan amoroso di den pasado, kada unu ku nan propio retonan i lèsnan di bida.
E estreno a tuma lugá na The Movies Otrobanda i a konta ku un ‘Red Carpet’. Despues di disfrutá di e pelíkula, a sigui un seshon di pregunta i kontesta huntu ku e elenko presente. ‘Dating My Past’ ta marka e di tres biaha ku Chanelle ta paresé den un pelíkula. E pelíkula, ta dirigí pa Ricky Burchell i inspirá pa e buki ‘The Power Within, A Woman’s Worth: From Both Sexes’ di Aaron Jordan Jr. Despues di e estreno aki na Kòrsou e pelíkula lo estrená na Merka tambe. Na Kòrsou, públiko ta keda invitá pa wak e pelíkula ‘Dating My Past’ na The Movies Otrobanda i mira nos talento lokal bria den un pelíkula internashonal. Pa mas informashon bishitá e páginanan sosial di ‘Dating My Past Movie’.
