57 trahadó a risibí sertifikado
WILLEMSTAD- 11 di novèmber 2024 – Brazil ta un di e merkadonan prinsipal pa Kòrsou den region di Sur Amérika. Den e promé 9 lunanan di 2024, Kòrsou a risibí ya kaba 31.802 turista di estadia kual ta un kresementu di 82% kompará ku e mesun periodo na aña pasá. Mirando e kresementu aki, Ofisina di Turismo di Kòrsou (CTB) a tuma e inisiativa pa bolbe ofresé un kurso di idioma portugues pa trahadónan den industria di turismo ku ta den kontakto direkto ku turistanan brasilero. Pa e di dos edishon, un total di 57 persona a konkluí e kurso ku éksito. Yegando na un total di 122 persona ku e aña aki a risibí nan sertifikado di idioma portugues. Durante un seremonia ameno e graduadonan a risibí nan sertifikado for di man di sr. Raymond Jamanika, representante di Ministerio di Desaroyo Ekonómiko den representashon di Minister enkargá ku desaroyo ekonómiko i sr. Muryad de Bruin, direktor di CTB.
E kurso a keda ofresé durante 10 siman repartí den seshonnan di 2 biaha pa siman. E dosente tabata sr. Márcio Hypólito Pinto, un profeshonal den idioma portugues for di Brazil. E kurso a konsistí di seshonnan interaktivo enfoká riba formulashon di frase, kombersashon, pronunsiashon, tareanan i prueba pa evaluá dominio di e idioma. E partisipantenan a ekspresá ku e kurso a surpasá nan ekspektativa, nan ta sinti nan mes awor mas sigur pa por komuniká na portugues ku turistanan brasilero. E partisipantenan a inkluí trahadónan di hotèlnan, apartamentunan, aeropuerto, imigrashon, duana, transporte, guia turístiko, atrakshonnan turístiko, buseo, restorant i tambe algun empleado di CTB mes.
Ta importante pa personanan ku ta den kontakto direkto ku e turista risibí e oportunidat pa sigui avansá den nan karera miéntras ku e merkado ta sigui krese. Pa e motibu aki Ofisina di Turismo di Kòrsou ta sigui invertí den kursonan di idioma ku ta duna un kontribushon na desaroyo di e abilidat komunikativo di trahadónan den e industria i na mes momentu ta elevá e eksperensia total di e turista.
