WILLEMSTAD – 14 di novèmber 2024 – Ofisina di Turismo di Kòrsou (CTB) ta kontentu pa anunsiá kresementu kontinuo den kantidat di turista di estadia. Kòrsou a registrá un kresementu sólido di 11% den kantidat di bishitante kompará ku òktober 2023 registrando 5.419 turista di estadia adishonal. Total 53.234 turista di estadia a keda risibí na òktober 2024.
E periodo di ‘Herfstvakantie’ a kontribuí signifikantemente na e kresementu aki, prinsipalmente for di Hulanda, kual ta Kòrsou su merkado prinsipal, kaminda un kambio notabel den e demografia di turistanan a inkluí mas famia ku yu. Djabièrnè i djasabra tabata den luna di òktober e dos dianan di siman riba kua mas tantu turista a yega nos pais. Kada un di e dianan aki, a kontribuí signifikantemente na e total di turistanan ku a yega Kòrsou ku avion.
Prestashon tòp 3 merkadonan na òktober
Hulanda: Un kantidat di 20.114 turista di estadia hulandes a keda registrá na òktober, demostrando un kresementu di 16% kompará ku 17.395 turista di estadia registrá na òktober 2023. Mayoria turista hulandes (55%) a opta pa un otro opshon di akomodashon ku no ta resort, miéntras e 45% a skohe pa keda na un resort hotel. Turistanan hulandes a keda un promedio di 10.7 anochi durante nan bishita.
Estádos Unídos: Estádos Unídos ta sigui ta un merkado fuerte pa Kòrsou, ku un oumento di 20% yegando un total di 12.544 bishitante na òktober 2024, kompará ku 10.483 risibí e mesun luna na aña pasá. Mayoria turista merikano (74%) a skohe pa resort hotels, miéntras 26% a opta pa otro opshon di akomodashon. Turistanan prosedente di Estádos Unídos a keda un promedio di 5.8 anochi riba Kòrsou, miéntras mayoria tabata prosedente di New York, Florida, New Jersey, Texas i Georgia.
Colombia: E merkado di Colombia a registrá un subida di 11% na òktober 2024, yegando na un total di 3.914 turista kompará ku e 3.525 risibí na òktober 2023. Turistanan prosedente di Colombia a keda un promedio di 5.8 anochi riba nos pais, kaminda 52% a skohe pa un resort hotel.
Resúmen di aña te ku awor durante 2024
Kòrsou su industria di turismo ta mustra stabilidat sólido den 2024, ku un enfoke stratégiko pa keda konsistente den akshonnan di promoshon den e merkadonan prinsipal. E kresementu aki ta resaltá e éksito di Kòrsou den krea demanda dor di mustra tur loke nos tin di ofresé pa bin “Sinti’é pa bo mes” (Feel It For Yourself).
Te ku awor Kòrsou a risibí 566.827 turista di estadia, 23.730 day trippers, 627.395 turista krusero, yamando bon biní na un total di 1.217.952 turista di yanüari pa òktober 2024, kual ta 23% kresementu kompará ku e mesun periodo na aña pasá.
