WILLEMSTAD – 13 di desèmber 2024 – Ofisina di Turismo di Kòrsou (CTB) ta kontentu pa anunsiá kresementu kontinuo den kantidat di turista di estadia. Kòrsou a registrá un kresementu fuerte di 15% den kantidat di bishitante kompará ku novèmber 2023 registrando 7.587 turista di estadia adishonal. Total 59.771turista di estadia a keda risibí na novèmber 2024.
Kòrsou a habri e temporada di wenter 2024/2025 di un manera fuerte, e kantidat di turistanan risibí na luna di novèmber a mustra un prestashon impreshonante. Partikularmente motivá pa e merkado prinsipal di Kòrsou kual ta Hulanda, siguí pa Merka i Canada. Djabièrnè i djasabra tabata den luna di novèmber e dos dianan di siman riba kua mas tantu turista a yega nos pais. Kada un di e dianan aki, a kontribuí signifikantemente na e total di turistanan risibí.
Prestashon tòp 3 merkadonan:
Hulanda: Un kantidat di 20.993 turista di estadia hulandes a keda registrá na novèmber, demostrando un kresementu di 15% kompará ku 18.327 turista di estadia registrá na novèmber 2023. Mayoria turista hulandes (59%) a opta pa un otro opshon di akomodashon ku no ta resort, miéntras 41% a skohe pa keda na un resort hotel. Turistanan hulandes a keda un promedio di 11.5 anochi durante nan bishita.
Estádos Unídos: Estádos Unídos ta sigui ta un merkado fuerte pa Kòrsou, ku un oumento di 31% yegando un total di 14.660 bishitante na novèmber 2024, kompará ku 11.208 risibí e mesun luna na aña pasá. Mayoria turista merikano (69%) a skohe pa resort hotels, miéntras 31% a opta pa otro opshon di akomodashon. Turistanan prosedente di Estádos Unídos a keda un promedio di 5.9 anochi riba Kòrsou, miéntras mayoria tabata prosedente di New York, Florida, New Jersey, Texas i Georgia.
Canada: E merkado di Canada a registrá un bahada leve di 2% na novèmber 2024, yegando na un total di 3.881 turista kompará ku e 3.953 risibí na novèmber 2023. Canada ta surgi komo e di tres merkado ku a registrá mas tantu turista durante novèmber, risibiendo un tiki mas tantu turista kompará ku Colombia (3.562) i Brazil (3.193). Bishitantenan prosedente di Canada a pasa un promedio di 8.1 anochi na Kòrsou, kaminda 63% a skohe pa keda na un resort hotel.
Resúmen di aña te ku awor durante 2024
Kòrsou su industria di turismo ta mustra stabilidat sólido den 2024, ku un enfoke stratégiko pa keda konsistente den akshonnan di promoshon den e merkadonan prinsipal. E kresementu aki ta resaltá e éksito di Kòrsou den krea demanda dor di mustra tur loke nos tin di ofresé pa bin “Sinti’é pa bo mes” (Feel It For Yourself).
Di yanüari pa novèmber 2024, Kòrsou a risibí 626.592 turista di estadia, 28.332 day trippers, 706.077 turista krusero, yamando di e manera aki bon biní na un total di 1.361.001 turista. Esaki ta representá un kresementu remarkabel di 20% kompará ku e mesun periodo na 2023. E prestashon fuerte di Kòrsou ta resaltá e kompromiso kontinuo pa atra’é bishitantenan i ofresé eksperensianan eksepshonal den e merkadonan prinsipal.
