WILLEMSTAD- 18 di desèmber 2024 – Ku plaser Kòrsou a yama bon biní na Wingo su buelo inougural for di Medellín, Colombia. Introdukshon di e ruta nobo for di Medellín ta afirmá e aerolínea su kompromiso ku Kòrsou pa sigui trese mas turista for di Colombia pa konosé e produkto turístiko variá ku Kòrsou ta ofresé. E ruta nobo, ta komplementá e aerolínea su skema di buelo eksistente pa Kòrsou ku ta inkluí ya kaba buelonan for di Bogotá. E konekshon for di Medellín lo tuma lugá 2 biaha pa siman riba djárason i djasabra. Pa selebrá e okashon spesial aki, a risibí e promé buelo ku e tradishonal saludo di awa i a tene un seremonia di bon biní.
Colombia ta Kòrsou su merkado prinsipal for di Suramérika, registrando mas ku 41 mil turista di estadia te ku fin di novèmber 2024, un kresementu di 22% kompará ku e mesun periodo na aña pasá. E ruta nobo for di Medellín lo trese mas turista i aportá di e manera aki na kresementu ekonómiko. Durante e seremonia a hiba palabra, sr. Charles Cooper, Minister di Tráfiko, Transporte i Planifikashon Urbano i alabes Minister di Desaroyo Ekonómiko, sr. Andrés Camilo Franco, Corporate Communications Head na Wingo, sr. Jonny Andersen, CEO di Curaçao Airport Partners i sr. Julian Diaz de Pool, Commercial Manager na Curaçao Airport Holding. Mas aleu, Minister Cooper i sr. Hugo Clarinda (Ofisina di Turismo di Kòrsou) huntu ku representantenan di MEO, CAP, CAH i sr. Pablo Rebolledo (kònsel di Colombia) a hasi entrega di un plakat konmemorativo na sr. Andrés Camilo Franco (Wingo) ilustrando nos brùg di ponton i un bista di Handelskade parti anochi. Awor mas turista prosedente di Colombia por bin eksperensiá nos variedat di atrakshonnan turístiko, disfrutá di eventonan kultural, purba nos kushina lokal i mas ku tur kos interkambiá ku nos hendenan amabel.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Wingo ku nan ruta nobo. E ruta, Medellín – Kòrsou ta brinda e posibilidat pa Kòrsou risibí mas turista for di Colombia i alabes e ta nifiká mas opshon di biahe pa nos pueblo lokal.
