WILLEMSTAD – 12 di mart 2025 – Un tim di Kòrsou konsistiendo di representantenan di Ofisina di Turismo di Kòrsou (CTB), Curaçao Airport Partners (CAP) i 12 partner di sektor privá a partisipá siman pasá na ITB Berlin na Alemania. Ta trata di un di e ferianan turístiko di mas grandi mundialmente. Meta prinsipal di Kòrsou su partisipashon tabata pa estrechá lasonan komersial ku partnernan internashonal. Durante e feria di 3 dia, e tim di Kòrsou a reuní ku entre otro operadornan di tour, aerolíneanan, agensianan di biahe ku ta aktivo online i prensa dirigí riba komersio.
E aña aki, ITB a konta ku partisipashon di 5800 kompania representando 170 pais i a atraé mas di 100 mil bishitante di kual 87% ta bishitantenan prosedente di pafó di Alemania. Kòrsou tabatin un stènt kolorido di 100m2 ubiká den e Caribbean Hall. Durante tur e dianan di e feria e tim di Korsou a sostené diferente kombersashon ku partnernan internashonal pa di un forma stratégiko elaborá riba akshonnan i inisiativanan konhunto pa sigui oumentá e kantidat di bishitantenan for di Alemania pa Kòrsou. Durante e di dos dia di e feria, CTB a tene un sena pa tur e partnernan lokal ku a forma parti di e tim di Kòrsou i e Product Managers di partnernan internashonal DER Touristik i Alltours.
Un danki ta bai na e partnernan di sektor privá ku a forma parti di e tim di Kòrsou durante ITB 2025; Coral Estate Luxury Resort, Curaçao Marriott Beach Resort, Renaissance Wind Creek Curaçao Resort, Sandals Royal Curaçao, FBTT, Morena Eco Resort, Acoya Curaçao Resort, Villas & Spa, Mangrove Beach Corendon Curaçao All-Inclusive Resort, Curio by Hilton, Kontiki Beach Resort, Royal Resorts Caribbean, Papagayo Curaçao i Pietermaai Boutique Hotel. Alemania ta keda un merkado importante pa Kòrsou p’esei partisipashon na tipo di ferianan manera ITB ta sumamente importante. E eventonan aki ta ofresé e oportunidat pa kolaborá ku partnernan komersial i interkambiá riba e maneranan pa atraé mas bishitante pa Kòrsou.
