Student Information

Te ku 1989, e aktividatnan turístiko na Kòrsou tabata reglá dor di un servisio gubernamental. Dia 23 di yanüari 1989 e gobièrnu di turno a tuma e desishon pa retirá polítika turístiko for di e esfera polítiko i pa pon’éden man di un fundashon spesial, yamá Curacao Tourism Development Foundation (CTDF). Pasobra Gobièrnu a mira e importansia di turismo pa desaroyo di nos ekonomia. CTDF ta e nòmber statutario, i Curacao Tourist Board (CTB) ta e ‘handelsnaam’ (nòmber komersial).

CTB ta goberná dor di un konseho, ku ta formá dor di representantenan di gobièrnu, e sektor privá i tambe via sindikato, ku direktamente i indirektamente ta envolví den e turismo di Kòrsou. Konseho di Minister ta nombra presidente di e direktiva. 

CTB tin su ofisina sentral na Kòrsou. Tin ofisinanan na Hulanda i na Merka tambe.

Riba 1 di òktober 2024, Ofisina di Turismo ta kumpli 35 aña di eksistensia.

E vishon di Curaçao Tourist Board ta pa posishoná Kòrsou komo e destinashon karibense di mas eksklusivo, konosí pa e diversidat di su oferta turístiko, i pa asina fortalesé e lenk entre turismo i otro sektornan di e ekonomia, pa por logra desaroyo duradero i proveé un kalidat di bida haltu pa siudadano lokal.

Su mishon ta pa krea eksperensianan turístiko úniko, i pa den e sinku añanan benidero, logra tantu kresementu kontinuo di yegada komo di entrada for di loke bishitantenan ta gasta durante nan estadia.

1. Diseñá i implementá programa di merkadeo/promoshon i programa di konsientisashon.
2. Sostené i inisiá inisiativa pa mehorá eksperensia di turistanan.
3. Konsehá gobièrnu tokante implementashon di maneho turístiko.

Kompilá dato i reportá tokante nan, i hala atenshon tokante trend.

1. Guia kampañanan di branding i marketing
2. Market intelligence: proveé informashon, skèn di merkado pa kada pais, perfil di turista i grupo di enfoke, biahe di kliente, evaluashon/análisis di kompetidor.
3. Atraé i retené transporte aéreo i linia di krusero pa desaroyo turístiko.

• Integridat
• Responsabilidat
• Empatia
• Kolaborashon (Teamwork)
• Konfiansa
• Fleksibilidat

Na Ofisina di Turismo bo ta haña tur informashon relashoná ku Turismo. Mayoria bes turistanan ta bini na Ofisina di Turismo pa haña informashon di Kòrsou i tambe tuma konseho di kua ta e lugánan ku nan por bishitá, dependiendo di e turista su interes. Serka Ofisina di Turismo bo ta haña entre otro: foyetonan di atrakshon turístiko, rèstorant, tour, hotèl i otro akomodashonnan, mapa di Kòrsou, museo, i hopi informashon mas.

Tambe un turista por bini na Ofisina di Turismo si e tin un reklamo. E reklamo por ta algu relashoná ku un eksperensia ménos agradabel òf tambe pa yuda drecha servisio di kualke atrakshon ku el a bishitá òf un akomodashon kaminda el a hospedá. Ofisina di Turismo na su turno ta tuma e keho òf reklamo i nos ta hasi “damage control”, dependiendo di gravedat di e kaso.

“Damage control” ta nifiká ku CTB ta duna e turista un eksperensia positivo pa purba lag’e lubidá esun negativo. Si e situashon ta hopi grave, Polis di Turismo (Politur) ta atendé ku esaki huntu ku polis i slachtofferhulp (sosten pa víktima).

Ofisina di Turismo ta un organisashon chikitu ku no mas di 48 empleado, konsistiendo di 2 direktor, managernan, koordinadónan, officernan i partaimernan. Bou di managernan ta kai entre otro e koordinadónan, ku ta esnan ku ta yuda guia e “ofisial”. Ofisialnan ta tur trahadó ku no ta manager ni koordinadó.

E mayoria di e empleadonan ta situá na Kòrsou i algun ta situá den e regionnan di enfoke di CTB manera Hulanda, Alemania i Estádos Unidos. Banda di esei CTB ta traha tambe ku diferente representante dentro di e diferente regionnan di enfoke.

1. Departamento di Produkto
   E departamento di produkto ta sòru pa maneho, mantenshon, bienestar i desaroyo di e produkto turístiko di Kòrsou.
   Pa por logra esakinan, e departamento ta enkargá ku entre otro e siguiente tareanan:

• • Konsientisashon: konsientisá komunidat di Kòrsou di e importansia di Turismo;
  • Edukashon: promové Turismo komo materia na Skolnan di Fundeshi i Skolnan spesial;
  • Desaroyo di produkto: sostené desaroyo di proyektonan i inisiativanan nobo pa turismo; mantené, desaroyá i konservá e áreanan turístiko; garantisá kalidat pa medio di un programa di ouditoria ku énfasis riba Akomodashon Alternativo i Skolnan di Buseo; i promové sostenibilidat di e industria.
  • Seguridat: garantisá seguridat di e bishitantenan i desaroyá un estrategia efisiente i efektivo di krísis den kolaborashon ku otro entidatnan gubernamental i partnernan di sektor privá, pa mitigá kualke daño potensial ku por presentá.

2. Departamento di Finansa
   E departamento di finansa ta atministrá tur asuntu finansiero di henter Ofisina di Turismo. Tambe nan ta sòru pa pagonan na stakeholder i/òf empresa ku ta duna servisio na CTB.
3. Departamento di Rekurso Humano
   E departamento di rekurso humano ta sòru pa tur asuntu di trahadó. E departamento aki ta atendé ku tur asuntu di trahadónan di Ofisina di Turismo; por ehèmpel salario, dia di fakansi, yuda e trahadó krese den su karera, etc.
4. Departamento di Komunikashon
   E tarea prinsipal di e departamento ta pa informá nos komunidat i stakeholdernan lokal di:

1. 1. e aktividatnan di promoshon ku CTB ta ehekutá den e merkadonan di enfoke.
   2. e aktividatnan ku CTB ta ehekutá den e área di desaroyo di e produkto turístiko.
   3. e balor ekonómiko di industria di turismo pa Kòrsou.
   4. aktividatnan di konsientisashon tokante turismo di Kòrsou.

Distribushon di e informashon pa komunidat i stakeholdernan ta bai via korant, televishon, radio i medionan sosial, hasiendo uso di entre otro konferensia di prensa, komunikadonan, spòt na radio i televishon, boletin informativo online, i programanan di resúmen di aña. Ademas e departamentu di Komunikashon ta asistí otro departamentonan den CTB ku diseño di invitashon, aviso i rapòrt.

5. Departamento di Fasilidat
   E departamento aki ta tene nos edifisio, i e esfera paden i rònt di Ofisina di Turismo na òrdu, di moda ku trahadónan por ta konfortabel. Tambe nan ta sòru pa tur fasilidat den edifisio di Ofisina di Turismo; por ehèmpel stul, mesa, ekipo di e ofisinanan, tambe tur material di ofisina, etc. Ademas nan ta sòru pa tur fasilidat teknológiko manera kòmpiuter, laptop, pantaya, etc. Banda di esaki nan ta yuda organisá evento di e diferente departamentonan i yuda ku f&b, lokalidat, ekipo oudiovisual etc.
6. Departamento di “Business Intelligence”
   E departamento aki ta sòru pa tur sifra di turismo. E ta proveé informashon di kuantu turista ta bini Kòrsou, unda nan ta keda, kuantu turista ta bini ku avion òf ku barku, i asta kuantu sèn nan ta gasta for di e momentu ku nan ta yega na Kòrsou. E komprondementu ku datonan asina ta duna tambe ta sirbi komo base pa toma di desishon pa sigui promové turismo na e isla.
7. Departamento pa Desaroyo di Strategia i Planifikashon
   E departamento aki prinsipalmente ta responsabel pa kordiná trahamentu di strategia i plannan pa desaroyo di turismo i monitor e ehekushon di esakinan. Kaminda ta nesesario ta asistí i duna konseho na partnernan den industria di turismo den sektor privá i públiko.
8. Departamento di “Cruise and Yachting”
   E departamento aki ta kompartí responsabilidat pa kresementu di e kantidat di bishitante den e sektor di “cruise and yachting” ku e meta pa mantené i/òf oumentá bishita eksistente y asina subi e montante ku kada pasahero ta gasta na e isla. Esaki nan ta hasi via “nètwèrk”, konstruyendo relashon ku cruiseline y mayorista ku ta spesialisá den krusero, hasiendo yamadanan di “benta”, i provishon pa maneho di informashon (estadístiko).
9. Departamento di Auditoría
   E mishon di ouditoria interno ta pa asistí direktiva ku mantenshon di sistemanan adekuá, efisiente, i efektivo pa mehorashon kontinuo di kalidat i pa logra su ophetivonan, dor di trese un aserkamentu sistemátiko i disiplina pa evaluá i mehorá efektividat di e organisashon su governance, risk management, i kontrol interno.
10. Departamento di Asuntunan Legal
    E departamento aki ta kontistí di un konsehero legal ku ta sòru pa tur asuntu legal di Ofisina di Turismo ta na òrdu.
11. Departamento di Merkadeo
    E departamento aki ta enkargá ku entre otro merkadeo den e diferente regionnan di enfoke, pa medio di merkadeo tradishonal i relashonnan públiko i digital. Banda di esaki tambe e departamento ta konta ku un “Destination services” tim enkargá ku kreashon i koordinashon di e itinerarionan di prensa, “FAM trips” i “influencers”.
12. Timnan di region
    CTB ta konta ku 3 tim pa kada region, esta:

1. 1. Europa (ku un enfoke prinsipal riba Hulanda, Alemania i Bélgika).
   2. Nort Amérika (Merka i Canada).
   3. Sur Amérika i Karibe (ku un enfoke riba Colombia, Brasil, Sürnam, Aruba, i Trinidad & Tobago).

Kada manager di region ta sòru pa krea konsientisashon tokante Kòrsou ku e meta pa motivá benta den nan region huntu ku e partnernan. Esaki ta enserá kolaborashonnan ku operadornan di tour, agentenan di biahe i aerolíneanan i tambe e sektor lokal pa loke ta bishita na feria turístiko. Banda di esaki kada manager di region ta enkargá ku desaroyo di turismo di MICE (“Meetings, incentives, conferences & exhibitions”), kua tin komo meta pa trese gruponan grandi di persona huntu na Kòrsou pa diferente tipo di evento, loke tambe ta kontribuí na kresementu ekonómiko di Kòrsou i ta sirbi pa engrandesé turismo.

Ofisina di Turismo tin diferente stakeholder aki na Kòrsou, manera:

• Ministerio di Desaroyo Ekonómiko (MEO)
• Curaçao Hospitality And Tourism Association (CHATA, Asosiashon pa Hospitalidat i Turismo)
• Curaçao Apartments and Small Hotels Association (CASHA)
• Curaçao Restaurant Association (CRA)
• Koninklijke Horeca Nederland (KHN) departamento Kòrsou
• Curaçao International Airport
• Curaçao Airport Holding (CAH)
• Polis di Turismo (Politur)
• Curaçao Ports Authority (CPA)

CTB ta un organisahon di turismo asigná dor di gobiernu di Kòrsou pa traha riba promoshon i desaroyo di e produkto turístiko di Kòrsou.

Curacao Hospitality & Tourism Association (CHATA) ta un asosiashon ku ta representá e sektor privá, por ehèmpel hotèl, car rental etc. CHATA na su turno ta traha na bienestar di e sosionan.

Curacao Apartments & Small Hotels Association (CASHA) ta un asosiashon ku ta representá sektor privá primordialmente apartamentonan, akomodashonnan chikitu, car rental, etc. CASHA tin similaridatnan ku CHATA, solamente nan ta manehá i enfoká riba akomodashonnan i kompanianan turístiko chikitu.

Ofisina di Turismo via di CHATA ta yega na e sektornan privá, esta CHATA su miembronan, komo ku CHATA tin kontakto direkto ku nan. Mayoria bes Ofisina di Turismo i CHATA ta traha huntu den proyekto, promoshon, i kursonan pa yega na metanan ku ta benefisiá e sektor di turismo. Pues asina aki nan ta komplementá otro.

Bo por eksplorá e oportunidatnan aktual pa kore stazje i pa trabou serka Curaçao Tourist Board dor di bishitá nos página di karera.